فليبنوا الف أقصر فى ألف لاس فيجاس


مع صعود موضوع انشاء مدينة تحمل اسم و تحاكى مدينة الاقصر بولاية لاس فيجاس الأمريكية على السطح و مع استماتة الكثيرون فى الدفاع عن حقوق الملكية الفكرة و اللى ما اعرفش ازاى يركب مصطلح الملكية الفكرية على الموضوع دة و بعيدا عن اندفاع نوارة المعتاد و ايمانها بأى دكتور لمجرد ان يسبق اسمه حرف الدال على ان تلحقنا على طول و تقول دة و لا مدعى شهرة و لا عايز فلوس بعيدا عن كل دة نقييم الموضوع بهدوء و بدون انفعال و تعصب للهويه المصرية اللى على رأى واحد صاحبنا انه عمره ما شافها و لا قابلها قبل كدة
.
هل يحق لنا ان ننعت اسامى المدن و الأثار بحقوق الملكية الفكرية
.
مسمى الملكية الفكرية أظن واضح للجميع و لو الاخوة فكروا شوية فى معنى المصطلح اظن هايتكسفوا على دمهم حيث تتشابه اسامى المدن و تتكرر و اكيد اسكندرية اكبر دليل على كدة اما بخصوص ان الاثار ملكية فكرية و اللى مش عارف برضو جابوها منين دى كمان فمحاكاة الاماكن السياحية و بناء مدن كاملة او استنساخ بعض المناطق الاثرية فأمر واردو طبيعى و الا كانت مصر اول بلد تحاكم بسبب الحديقة الدولية و لا يمكن الربط ما بين قضايا حقوق النسخ و الاستغلال للعلامات التجارية ككنتاكى مثلا بمسميات المدن و البلدان لانها مش محتاجة شرح يعنى دى حاجة و دى حاجة تانيه خالص يعنى زى اللى يشبه بين حمار و قطة و يقول ما الاثنين حيوانات
.
هل خسرنا بأنشاء أقصر لاس فيجاس
.
الدكتور العلامة اللى نوارة جابت كلامه بيقول ان عدد السياح هناك اصبح 46 ملوين سائح و بيتسأل بحزن عن عدد السياح فى الاقصر الاصلية طيب يا دكتور حد حكالك لاس فيجاس فيها ايه اصلا و لا سياحتها معتمدة على ايه اساسا اظن لا لانك لو عارف كنت اصلا فكرت ان ليه السائح يزور تقليد لما ممكن يزور الاصلى و اظن دى غايبة اساسا و فكرة مش من هنا اصلا طيب حد قالك يا دكتور و بصفتى واحد اقصرى يعنى ان الاقصر الموسم السياحى دة كانت شغالة بكامل طاقتها و اللى تم الاعلان عن ازمة فى كثير من الصحف القومية و المستقلة ان السياح فى الاقصر مش لاقيين مكان يناموا فيه طاقة بلدك و عدد سرايرك كدة يا مواطن روح اقتل مبارك و لا فجر نفسك فى وزير السياحة بي ما تهجصش علينا و تقول ان اثر تقليد سحب 46 مليون سائح على حساب سائحى الاقصر الاصلية
.
طيب كسبنا ايه
.
محاكاة الاثار و المدن السياحية موضوع قديم زى ما قلت قبل كدة و يمكن لاس فيجاس نفسها عملاه فى عده مدن تحاكى بيها فينيسيا و الهند و على رأى واحد علق عند نوارة و لا ايطاليا زعلت و لا الهند ردحت . طيب هانروح بعيد ليه و عندنا مثل عربى و مش اسم مدينة دة اسم دولة بحالها و مش مكان سياحى لا دة استاد كرة قدم استاد الامارات المملوك لنادى الارسنال الانجليزى و الاستاد الرسمى هاتقولى اتدفع 100 مليون جنيه استرلينى هاقولك دة حق الرعاية و اللى دفعاه شركة طيران الامارات شركة طيران يا مواطن دفعت 100 مليون جنيه استرلينى علشان اسم بلدها يتقال لمدة 15 سنة بس فى كل ماتش و كل تحليل كروى , و اظن يعنى اكيد اى عيل صغير هايبقى فاهم ان الترويج لمثال للاثر لسياح المفترض انهم رايحين يلعبوا قمار و يهنكروا بيجر الرجل لزيارة الاثر الاصلى حتى لو مافيش قمار و هنكره زى فيجاس
.
مين ليه الحق يدافع عن الاقصر
.
لا مؤاخذه يعنى هيه الاثار دى بتاعتكوا اساسا الاثار الفرعونية و اى فن اتخلق على الارض ملك الناس كلها و الا انا واحد من الناس قبيلتى و اسرتى من السكان الاصليين يبقى احنا احق بكل مليم منكوا فى الاثار اللى بنوها اجدادنا و اللى انتوا اصلا اللى جايلى من الشام و اللى جايلى من المغرب و اللى بفتخر انه من الاشراف و نسل النبى و بيقولك احنا ورثة الفراعنة و حقنا دة اساسا لو هانتكلم عن سرقة عينى عينك امال لو بنتكلم عن اسم و ناس عملت محاكاه لمدينة و ما قالتش انها مدينة تل ابيب لا استخدمت الاسامى الاصلية و نسبت الحق للفراعنة
.
كوميديا
.
الدكتور بيقول ان اى حد هايعمل مدينة تانيه زى دى لازم يرجع للاس فيجاس طيب ماهو حقهم يا دكتور انا مش اعمل فكرة تجارية و سيادتك تيجى تسرقها كنت انت يا دكتور بالدكتوراه بتاعتك عملت مشروع زى دة و افدتنا كلنا قبل ما اى حد تانى يعمله و يبقى ليه ملكية فكرة المشروع احنا بنتكلم عن فكرة مشروع يا ريس مش بنتكلم عن المدينة و الاثار دلوقت . و الاجمل ان نوارة بتقول اى حد هايعمل مطعم فى الاقصر لازم يرجعلهم يا مثبت العقل يا رب
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

4 comments:

  1. مفهمتش الموضوع لانى قريت بسرعة
    ليا مداخلة تانية لما اصحصح كده واقرا بتفهم
    المهم انا دخلت اسلم وامشى
    ايه الاخبار؟
    وايه رايك فى الى حصل فى مبارة الزمالك والمصرى الى اتلغت
    انا مخنوقة من المصرواية

    ReplyDelete
  2. و الله يا جميل انا كنت نايم لسه ما حدش اتصل بيا بلغنى القرار ايه انا اللى اعرفه ان الاتحاد كان هايجتمع يوم الاثنين علشان ياخد قرار و عرفت ان المصرى هدد بالانسحاب من الدورى لو الماتش ما اتعادش

    ReplyDelete
  3. بس تعرفى لو الماتش دة اتعاد هاشجع مكابى تل ابيب و لا بن حبيل

    احسنلى من الدولة الظالمة بنت الظالمة دى لان حكم اتشتم فى ماتش احنا ذنب ابونا ايه هوه الحكم احسن من شيكا يعنى اللى اتبهدل

    ReplyDelete