هاخد حقى .. عن بربرية أمن الدولة فى التحرير أدون


الوصف التفصيلى للمظاهرة أتكتب عشرات منه

و الصراحة أصبح لا يعنينى أن أصف مظاهرة ... لان لا جدوى من ذلك

لأن المهتم كان فى الشارع ساعتها بيهتف ... أما الباقى
يتفرجوا فيديوا عليها احسن و أشيك ... بدل البهدلة و المرمطة
من ضرب ... و اسبراى دفاع عن النفس ... و شتيمه تشكيلة روعة
من برابرة أمن الدولة بصراحة .. لحد الاختراع الجديد
الكور المطاطية اللى كانوا شايلينها فى الاخر
-----------------------------------
7a2e2 7a2e1
-----------------------------------

أما عن خطفى من المظاهرة و محاولة أعتقالى
-------
فأحسبها صك الخروج من العبائة المباركية
و شهادة لأولادى ... أننى لم أكن منبطحا فى يوم من الايام
و لم أكن منساقا ماسحا لجوخ النظام
مهرولا وراء أذيال عبائته .. متنمنيا الرضى السامى
فى شباب حزب البتنجان الوطنى و لا جاريا وراء مكاسب ماديه
تزخر بها خزائنه
فكلها سنوات و تبدأ المحاسبة ... و أحسبنى خارجها
قد تتأثر زوجتى ... و تنهار من ذلك المنظر و لكنها تعرف اننى صلب و عنيد
و تعرف أيضا أنه من الشرف أن يقذفك الطاغية بحجر
فأنت هكذا من أعدائه
------------------------
الى والدتى الناشطة فى الحزب الوطنى
أما ان لكى أن تفيقى بعد رؤيتك لأبنك هكذا ؟؟؟
أما ان لكى ان توارى أفتخارك بتوكيل حسنى بتاع أنتخابات الرئاسة ؟؟؟؟
للاسف شاركتى فى جلب من فتكوا بأبنك الى الحكم
ربك يغفرلك ... أما انا فلا أنسى
--------------------------
الى ذلك النظام العميل الخائن و كلابه
أن يعضك كلب فذلك شىء طبيعى ... لا أراه بطولة
فأنا لست بطلا .. أنا مجرد مواطن
أهدرتوا كرامته فى وضح النهار
مواطن أنفق 27 سنه فى صنع كيانه و كرامته
فأهدرتها الكلاب فى ثوانى فى وسط البلد
----------------------------
أخوتى و أحبتى و رفاقى
ليس من العيب ان تهتك كرامتك فى وضح النهار
و لكن العيب أن تسكت على ظلم وضح النهار
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

النظام يغسل أكثر بياضا


OMo

و أنا أستحم اليوم تذكرت أحساسى القديم
فأنا أتذكر دوما من ظلمتهم و الصابون مغطى وجهى
و لطالما بحثت عن تفسير ذلك الاحساس ... حتى مع طبيبى النفسى
و اليوم أنتابتنى أفكار عبثية على رأى سيزر
ماذا يحدث فى القصر الجمهورى كل صباح أثناء غسيل فخامة الوجة المعظم
و أشفقت على فخامة رئيسنا .... من أطنان الصابون و مساحيق الغسيل
التى يشعر بها من جراء من ظلمه
و لعله التفسير الامثل لحكومة أحمد نظيف المستمرة حتى الان
لان بالطبع النظام دائما يغسل أكثر بياضا
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

عاجل : حماس تضرب الحدود المصرية


الحدود

كنت قد أتصلت بسيزر فجر أمس لكى يكتب بدلا عنى تلك التدوينة نظرا لأحتجازى لوجود العديد من الاكمنة على جميع الطرق هنا و لكنه من المؤكد انه شغل عن هذا الموضوع
أستمرارا لتواجدى فى المنفى الاختيارى اشعر يوم بعد يوم ان العريش بلد مستقل نهائيا عن مصر بل و معزول و بالرغم من سخونة الاحداث اليوميه هنا الا يتم التعتيم عليها بشكل مرعب و ملخص الاحداث كالتالى
قامت حماس بالامس بضرب الحاجز الحدودى المصرى و ذلك بعد الاحداث الساخنه من أحتجاز الفلسطينيين على الحدود لمدة 15 يوم متواصلة .... كنت قد تكلمت فى تدوينة سابقة احوال المحتجزين الفلسطينيين و عرفت المزيد بالامس
أنهم وصل عددهم الى خمسة اللاف على الحدود و ألفين داخل صالة المنفذ و لقد مات ثمانية أفراد فى الصالة و ذلك نتيجة سوء الاقامة
الفلسطينيين المحتجزين أنفقوا ما كان معهم من أموال و يعيشون على الفتات الا الميسور الحال منهم الذين حجزوا غرف فى فنادق بالعريش
جائنى خبر ضرب الحدود عن طريق سائقى الميكروباص على طريق رفح و الذين يعملون فى تهريب الفلسطينيين عن طريق الطرق الجبلية الخاصة بتهريب المخدرات مثل طريق لحفل أو لحفن لأ أتذكر بالضبط ... كان السائق تلو الاخر يحضر و يزودنا بمعلومات تؤكد كلام زملائه و تضيف عليها أخر الاحداث فالكل يؤكد أن الثغرة فى الجدار الحدودى كبيرة حتى أن بعض السيارات قامت بأختراقها و عبر العديد من الفلسطينيين الحدود الى مصر و رجع معظم المحتجزين عن طريقها و لقد قامت قوات الامن بالعريش بأرسال عشرين عربة أمن مركزى لتطويق المنطقة مع نشر الأكمنة على جميع الطرق و ذلك للامساك بجميع الفلسطينيين المخترقين للحدود و أرجاعهم مرة أخرى
و التدقيق مع كل غريب عن العريش مما أضطرنى الى المكوث فى مكانى المنعزل الواقع على طريق رفح
حضر أحد زملائى و أبلغنى أن قناة الجزيرة نشرت الخبر و لكنه خبر عابر صغير بدون صور أو فيديو
أحاول الان الوصول لمكان الثغرة للتصوير و لكنى أجد صعوبة بالغه فى ذلك
على العموم الموضوع قابل للتحديث
فخليكوا متابعين
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

مصريون يقولون لا لفلسطين


بعد الاحداث السابقة قررت أن أبتعد عن الاحداث الجارية و الماشية كلها و أخترت مكان منعزل و تخلصت من موبايلى ومفيش فضائيات مفيش جرايد مفيش أى حاجة غير حياة بدائية على شاطىء خاص و لأن المدونة هنا بعتبرها بنتى ما قدرتش أبعد عنها كتير و قررت التوجه لاقرب مقهى أنترنت
صاحب المقهى رجل غريب بمعنى الكلمة لهجته مزيج من العريشى على المصرى على الفرنسى على الالمانى
و لما شاف المواقع اللى انا فاتحها جيه و كلمنى و عرفت انه كان مناضل و هرب على اوروبا و اخد الجنسية الفرنسية
قالى عايزك تكتب عن اللى بيحصل هنا ... الفلسطينيين على منفذ رفح محتجزين و مش عايزنهم يرجعوا بلدهم
و الحدود مقفوله و أحنا بنلم لهم فلوس علشان نشترى لبن للاطفال و نساعدهم على الاقامة
طمنته أنى هاكتب و لما رجعت لمكانى المنعزل اللى انا أخترته
جيه زارنى بعض اصدقائى من ولاد البلد
و لما فتحت الموضوع لقيت الكل بيشتم على الفلسطينيين و فلسطين و اللى جابوها
أستغربت و لما سألت قالوا لما الحدود اتفتحت أسبوع علبة السجاير وصل ثمنها لعشرة جنيه
و الرغيف لجنيه و ما كناش لاقيين حتى الجبنه ناكلها
حاولت أهديهم و أتوصل معاهم لحل وسط أنه على الاقل دول بنى أدمين
نسيبنا من الاخوة فى العروبة و الكلام دة و خلينا نشوفها من منظور انهم بنى ادمين
أصروا على رائيهم و ان الفلسطينيين المفروض يتمنعوا من الدخول
و ان اللى بيحصلهم على المنفذ دة حلال فيهم ... لانهم ليه يدخلوا مصر من الاساس
ودعتهم فى نهايه السهرة و أنا مستعجب
هوه فى فى مصر ناس كدة ؟؟
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

صور مظاهرة السفارة الاسرائيلية


فيما يلى صور مظاهرة الاحتجاج أمام السفارة الاسرائيلية و التى أحبطها الامن و عدم التنظيم الجيد أدى الى فشلها من الملاحظ عدم دقة التصوير و ذلك لصعوبة التقاط الصور بالموبيل و بجانبى كل ضباط أمن الدولة حيث انهم شكوا فى النهاية أنى بصور و جيه تلاتة حاوطونى و اليكم الصور و التعليق عليها A(323)
أول ما طالعته التمثال مكان التجمع فى ساعة الصفر

A(324)

مكان التجمع تحت التمثال و يظهر أفراد أمن الدولة محيطين به

A(322)

العربيات المصفحة على جانب الطريق و خلفها جلست شلة الانس من الضباط اصحاب الرتب الكبيرة

و اللى منعوا المواطنين الغلابة من الركوب من محطات الاتوبيس فى الجانب دة كله

A(313)

دكتورة ليلى والدة علاء و مدام منى والدة سلمى و بعض النشطاء على الشمال و ضباط أمن الدولة على جهة اليمين

A(315)

يتكلمون و يتناقشون و قد حوطهم الامن

A(312)

مدام ليلى تحاول الاتصال بالجميع و تتلقى المكالمات التليفونية للاطمئنان على الاحداث

A(311)

فى الركن الايمن وجة الضابط بطل الاحداث القادمة واقف على بعد خطوة منى تحت المظلة

A(310)

نفس الظابط بالقميص اللبنى فى المنصف يحاول ابعاد الاهالى عن النشطاء

A(309)

بيقوموا الناس و يبعدوهم و الناس مش فاهمه اى حاجة

A(317)

مدام ليلى تنقذ الشاب اللى اشتبك مع الظابط ابو قميص لبنى بعد ما مسكوا فى بعض و خدوه و مشيوا بيه

A(318)

المفاوضات مستمرة

A(316)

الناس جريت تتفرج على اللى ماسكينه دة

A(319)

حضرت نادية و سلمت و وقفت شويه و مشيت

A(326)

و مازال العلم الاسرائيلى يهفهف متحديا أرادة الشعب المصرى

و مستغلا ضعف و خنوع الحكام

A(325)

الوصف التفصيلى فى التدوينة اللى قبل دى

Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

مظاهرة لم تحدث


قررت نشر الصور فى تدوينه مستقلة "
  • لم يكن سهلا أن أترك كل شىء و أترك عملى و ما أقوم به فى أحدى المحافظات وأرجع للقاهرة لحضور ذلك اليوم ... يعلم الكثير و قلتها فى مجموعة بريدية أنمبدأ التظاهر من أجل مطالب أى دولة داخل وطننا فكرة فاشلة ... فمصر أولى بكل جهد من أجل تحريرها .. و بعد أن ننال الحرية نساند الجميع و لكننى عقدت العزم على أن أحضر هذا التظاهر ... على الاقل فهى مبادرة واحد من المدونين كنت فى اليلة السابقة للمظاهرة أتصلت بمحمد عيد و بعمر سيزر و الاتنين أكدوا انهم هايحضروا المظاهرة يمكن دول الناس اللى انا بكلمهم تليفونيا و قلت أأكد عليهم أنهم يحضروا توجهت الى القاهرة فى الصباح و أتصلت بليوناردو لأنه طلب أن أصطحبه الى المظاهرة وصلت هناك فى الساعة الثانية و أربعون دقيقة ... لاحظت الوجود الأمنى الكثيف و عدم أى وجود أى شخص شكله يدى تظاهر نهائى ... كلها عائلات منتظرة فى محطة الأتوبيس الواقعة بجانب البوابة الرئيسية لحديقة الحيوان ... قمت بالذهاب ألى أمام الجامعة لاجراء بعض المكالمات التليفونية أتصل بعمر سيزر قال مش هاقدر أجى و قالى انا أتصلت بمالك و قال مش جاى و حاجات كتير كدة ما ركزتش فيها بصراحة ... علشان مش هايبقى كلام رخم و الشمس على دماغى... يكفى أحدهما رجعت الى مكان المظاهرة مرة أخرى فوجدت مدام ليلى والدة علاء و مدام منى والدة سلمى و سيدتان لم اعرفهما و رجل أخذت قرار اللا أتوجه اليهم حتى لا أخسر التصوير لانهم هاتبقى عنيهم عليا و هايمنعونى اكيد من التصوير كان الوجود الامنى حول النشطاء كتير بالنسبة لعددهم الذى لم يتجاوز الخمسة و مع محاولات و أصرار مدام ليلى على الاتصال تليفونيا فى محاولات يائسة لأنجاح المظاهرة زاد تشكك الأمن حتى أن واحد منهم كان يقف بجوارى قال : هاتموت و تجمعهم بس يبقوا يقابلونى دة زمانهم بيشخوا على روحهم من الخوف ضحكت و وقفنا تحت مظلة محطة الأتوبيس انا و ليوناردو بجانب أحد الضباط الشباب و طبعا فى قفانا كان واحد تانى موجود أشار لى ليوناردو ان أأخذ أحتياطى فهمته و غيرنا مسار الحديث الى مواضيع عن الشات و تفاهات النت و كلام على بنات وهميين و قمت بأمساك الموبيل و أخفائه تحت زراعى الاخر و أخذت فى تصوير الاحداث فلقد حضر شخص مصطحبا زميلة له و لأن الامن كان يبعد اى فرد عن النشطاء و من ضمنهم الاهالى و الحبيبة فتقريبا أعتقدوا ان الشاب واحد من الناس اللى كاتين بعد صلاة الجمعة وخارج يحب على الكورنيش فقرروا أبعاده هو و زميلته بعيد عن النشطاء فتوجه على الفور الضابط الشاب الواقف أمامى و قال لمحرز أحنا امن الدولة اشمى ياض و أمسكه من قميصه و دفعه أمامه ... و ما كان من الشاب الا أنه أشتبك معه و كلمه حق عجبنى الشاب لما مسكه من القميص و شمط الياقة فوق فرى حركة من حركات فريد شوقى و لأأن الشاب طويل فكان شكل الظابط مسخرة اللى فضل ماسكه من صدرة و مكتفه ... و قاله تعالى يا خويه قدامى و على الفور جرت مدام ليلى لتنقذه من بين أيديهم فلقد تجمعوا كلهم من حوله أستعدادا لأقتيادة لورى الشمس على رأى الجبناء تركوه بعد محاولات مدام ليلى و قاله يالا أمشى من هنا بعدها على الفور حضرت نادية و تحدثت مع الواقفون و جلست على سور حديقة الحيوان أنا و ليوناردو حتى أتمكن من التقاط الصور حسيت حاجة بتتحرك ورايا كنسلت وقعدت العب بالموبيل بعدها عرفت ان أتنين كانوا ورايا بيبصوا على الموبيل لانى كنت ساعتها رفعته غصب عنى و بان أنى بصور جيه كلب من أمن الدولة قالى : نزل رجل من على رجل قلتله ليه أن شاء الله قالى : نزلها الباشا واقف وراك بعدها لقيت الباشا المزعوم بيخبط على كتفى و بيقولى عادى عادى خليها و بيبتسم ... غريبة أول مرة أشوف واحد محترم منهم قلتله عادى أنا أنزلها أحترام و من زوقك كمان و فضلنا أنا و ليوناردو نتكلم فى حاجات هايفه تانى و كنا قد حاولنا عبور الشارع و الوقوف فى المحطة المقابلة لاخذ لقطات من كبار الرتب اللى كانوا قاعدين كالعادة فى الظل ... لكن واحد قالنا ممنوع الوقوف هنا يا ريت تقفوا فى الجهة التانية ظلت مدام ليلى تتلقى و تقوم بأجراء المكالمات التليفونية ... و أستمر تحجيز الامن عليهم برضوا و بعد اليأس من أن يجد جديد .. توجهنا لمدام منى و سلمنا عليها ... و قلتلها ما تقلقيش أحنا صورنا حسيت أنها فرحت .... و قالت أحنا خلاص ماشيين يا ريت تمشوا أنتوا كمان أتكلمنا شويه .... عن مين صاحب المبادرة و مدى مصداقيتها بعدها أستقلينا تاكسى و توجهنا لفيصل و مازال العلم الاسرائيلى يهفهف على السفارة مستغلا ضعف و خنوع الشعب المصرى

و لا عزاء لأسد صاحب المبادرة

على هامش اليوم حصلت أحداث كتير جدا فى اليوم دة تستحق ألف تدوينه - و دة اللى هاقوم بيه بالفعل الايام الجايه قابلت عمر سيزر فى فيصل على السريع و كان رايح حفله و دة ما خلاناش نتكلم كتير - قابلت وائل عباس مصادفة فى رمسيس و كان باين عليه أنه مخنوق و قرفان من كل حاجة -
أسد صاحب المبادرة خنق عليا بحوارات انا فى غنى عنها بصراحة لان مش القضية أذا كان
هو حضر و لا لا المشكلة كلها تكمن فى عدم الاعداد الجيد و عدم تحمل مسئولية مبادرة و التنصل منها
و رمى مسئولية التقصير على الناس اللى ما جاتش اصلا يا عم أسد الموضوع أنتهى و نفست غضبى
فى كلمتين طلعوا عليك انت بصفتك المبادرة
يبقى ريح دماغك بقة علشان انا مش بحب الكلام الكتير فى مواضيع منتهيه
و أنتظروا منى تدوينه التداعيات النفسية فيما بعد مظاهرة المهلبية
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

ميكا بكرة رايح على الجيش


Meka

لم أكن أعرف فى يوم من الايام و أنا المعفى نهائيا أننى سوف أكره التجنيد الى هذه الدرجة
فمنذ أول مشواره و أقتراب موعد تجنيده و نحن نعايش معه التجربة ... و نقاسى من الانتظار
و جائت النتيجة كالصدمة و لأول مرة أشعر بتلك المرارة ... على فراق شخص بالرغم منا نحن الاثنين
أيام و سوف يغيب عنا ... و تحل الصحراء و الرمال محل وجوهنا الباسمة من حوله
أشهر بمدى حزنه ... وعدم رغبته فى أى شىء
أشعر بقلقه ... من أيام سوف يقضيها لا يعرف عنها شيئا
أنه شبح التجنيد الالزامى
الهادم لأحلام و طموحات كل شاب
سوف ننتظرك ... يا ميكا و لن ننساك
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

أفرحوا النظام لسه بنت بنوت


كنت زمان بشبه الحكومة بالمومس اللى لفينها بملاية و مجرجرنها على البوكس و بعد مشاهدتى لفيلم عمارة يعقوبيان ... و سماعى للحكمة الجليلة " البت الشاطرة ممكن تريح الكل و هيه محافظة على نفسها " عرفت ساعتها ان النظام قرر انه يبقى بت واعية و مدردحة و يريح الكل و يستريح و لو مش مصدقنى ... راجع موقف النظام من القضية الفلسطينية و صورة رئيسك بين أحضان اولمرت و الموقف من القضاة و من قضايا النشر و و و و و مازال التحسيس مستمر على جسد بنت البنوت
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.