عيد ميلادى التدوينى و الأنطلاقة الثانية
ايها الشعب بعد سنة من عمرى التدوينى
أبشركم بمشروعى الذى يعد أمتدادا للفكر الجديد
سوف ننتقل إلى عصر المدونات النووية
- صوت هتاف جماهيرى حاد -
أهب مفزوعا من النوم مستعيزا من كل شياطين الارض فلكى أحلم هذا الحلم الرهيب لا بد و ان تكون كل شياطين
الارض عملت حفله لتخريب نومى الهانىء فلقد رأيت خير اللهم أجعله خير أنى بقدرة قادر
بقيت أبن الحاج بلوجر ذات نفسه و ظهر البلوجر فى الاحتفال بمرور سنة على عمرى التدوينى و قد شاخ و هرم
و شعره من كتر الصبغة وقف و أصبح لا يملك الا النظر الى المدونيين و هم يخطبون ودى طمعا فى زيادة مساحاتهم
الافتراضية ..... و فى ليلة عيد ميلادى التدوينى تقمعت و تلمعت بكل أكواد الاتش تى أم ال ووقفت أخطب فى الناس
و فى مخيلتى صورة لتخاريفى و هى تجلس على عرش التدوين لفترة رئاسة سادسة و لربما أكسر القاعدة و يتم تخليدى
و مع أعلانى برنامجى التدوينى النووى للفترة القادمة ارى الشعب التدوينى العبيط و قد سالت ريالته لوعودى البالونية
فأضحك ضحكة داخلية مجلجلة قائلا : أطمن الشعب دة راكع راكع
دعكم من التخريف السابق .... و لتعتبروه تشابه فى أسماء الدلع
فلقد منانى ربى بمصيبة أن يكون أسم دلعى نفس أسم الدلع الذى يلعن من النشطاء السياسيين ليل نهار
و لكننى تعودت على ذلك ممنيا نفسى بشقة و عربية لكل اللى اسمهم جيمى يهبطوا على رأسى المسكين
فى عيد ميلاد الرئيس القادم ..... شريطة أن نتحمل جزء كبير من السباب الموجه لوالدة سيادته
-----------------------------------------
فكرت ان تكون انطلاقتى الثانية حاجة تانيه فعلا
و زى ضيوف برنامج من سيربح المليون
قررت الاستعانة بصديق
و تم أختيار اسم له بمساعدة صديقى أيوب
تــــوتـــــو عــــبود
دة بعد ما اقنعنى ايوب انه قال ايه
يبقى على وزن جيمى هود
شكلى كدة ابتديت اغير منه
من فترة و انا بعمل الاعداد لظهور توتو عبود
و كل ما كنت ابص فى شكله احس انه غبى جدا
و سعات يكون زكى جدا
ارجع ابصله تانى احس انه مجنون
و كتير كنت احس انه اعقل العاقلين
فارتبطت به روحيا لانه من الاخر عامل زى حالاتى
------------------------------------------
اخيرا سنة زى كل السنيين يمكن يكون فيها تدوين
بس برضوا ما حلتش السؤال الغبى
زمان اتولدت ، دلوقت رايح لفين ؟؟؟
اللى مالحقش التورتة ممكن ياكل جاتوه فى الملحق
مع تحيات الراعى الرسمى لعيد ميلاد جيمى التدوينى
تـــوتو عــــبود
