شوبير و عندما يكون مقدم البرامج مخبر بدرجة عضو مجلس شعب
بداية كدة و بالراحة علشان الموضوع كبير أشار حارس المرمى السابق و المذيع و عضو البرلمان الحالى أحمد شوبير فى حلقته على قناة الحياة قبل مباراة الاهلى و الزمالك بيومين انه تم الترتيب مع شخصية أمنية هامة لاتخاذ اللازم تجاه تلك المجموعة - و يقصد مجموعة ألتراس اهلاوى - و تجاه مشجعين الكرة بوجه عام قبل مباراة الاهلى و الزمالك الاخيرة حتى لا يستمر ما أسماه بالمهزلة
الشخصية الامنية معروفة للجميع و معدى برنامج شوبير نفسهم فضحوه للجميع بعد ان تم تسريب انه اعد سى دى - نفس المحتوى المعروض فى الحلقة - و سلمه صباح يوم عرض الحلقة لمدير أمن القاهرة و أخد الضوء الاخضر لاذاعة الحلقة التى تزامن قبل و أثناء و بعد عرضها حملة موسعة للقبض على جميع أعضاء الالتراس تلك الحملة التى استمرت يومان و أسفرت عن القبض على أكثر من 250 مشجع أهلاوى و زملكاوى ليقضوا يومين فى الحبس تأمينا لأحداث مباراة الاهلى و الزمالك
محتوى السى دى عبارة عن حفلات و جلسات خاصة تجمع بعض الشباب فى منازلهم و هم يحتفلون يعنى بهدوم البيت و مش بزى الالتراس و لا فى المدرجات زى ما ادعى و اتهمهم بشرب المخدرات داخل مدرجات الاستاد ... طيب بالراحة كدة من أمتى بقة الاحتفال و الشرب فى البيوت يبقى أجرام و مين يدى الحق لأى إعلامى انه يسرق صور و فيديوهات شخصية من على موقع الفيس بوك عن طريق معدى برنامجه و يقوم بعرضه على شاشات الفضائيات منتهكا كل خصوصيات الافراد و حقهم فى ممارسة حياتهم الطبيعية بشكل مش مجرم قانونا و هل حصانة شوبير البرلمانية تديله الحق انه يسرق صور شخصية للناس من موقع الفيس بوك و يعرضها و يشهر بأصحابها على الفضائيات ؟؟
مش عارف بصراحة الاعلامى الكبير شوبير جاب منين الربط الغريب بين واحد لابس تيشيرت عليه جيفارا و بين ان مجموعات الالتراس كفرة و ملاحدة يمكن النقطة دى بالذات كتب عليها الاستاذ جلال عامر فى عموده فى جريدة البديل
النقطة الاهم فى الحلقة دى و اللى الكل ما اخدش باله منها .. ان شوبير افرد فقره كاملة فى حلقته فى قراءة محادثات قال نصا - انه طبعها من الشاتنج الخاص ببنات فى مجموعة الالتراس - ما علينا ان لغة الحوار باين قوى انها موضوعه و تأليف لا يا سيدى انا مع شوبير و مع انها حقيقية طيب سيادتك جيبت محادثات الشات منين ؟؟؟ هل كونك عضو فى الحزب الوطنى و عضو فى البرلمان دة يديك تصريح دخول لحياة الناس الشخصية و محادثاتهم على الانترنت اللى مفترض انها اسرار و بيتم حمايتها بموجب سياسة الخصوصية على الانترنت ؟ الاعلامى القدير و عضو الحزب الوطنى أعترف رسميا و ضمنيا انه بيتجسس على محادثات الشات لمشجعى كرة القدم المصريين و انه بيطبعها و بيقراها على الهواء مباشرة فى برنامجه ... طيب بالراحة كدة برضو ماهو الراجل دة يا اما بيتجسس علينا .. يا اما كذاب و كل دة تأليف .. انا شايف اننا نخيره ما بين الاتنين يا اما جاسوس او كذاب و هوه يختار
جزء من الحلقة يعرض فيه فيديوهات لحفلات خاصة تمت سرقتها من موقع الفيس بوك