أخر ما يربطنى بالجنوب


دة كان بينزل من المركب كل كام شهر و يدخل علينا من المينا طول إيه في عرض إيه , ويمشي من المينا لحد ما يدخل حواري (بكوس ) وهو بيغني .. النسوان بتفتح الشبابيك وتبص له , الله يرحمو كان بلطجي تمام , ما فيش فيكييا سكندريه صوت زي صوته , وتلاقيه إيه .. طول ما هو ماشي بيشرب في بيره ومخدراتلحد ما يوصل الفرح اللي هيغني فيه .. يطلع غلى الطربيزه بتاعت المسرح وهو بيغني وبيرقص و وراه مليون عازف إيقاع جايين من كل البلد من بحري لحد أبوقير , ويبتدي الله يرحمو بقى , يفكفك زراير القميص الأبيض بتاع البحريه شويه شويه لحد ما يرميه في الفضا ويفضل بالبنطلون الأبيض والفانله التحتانيه لامؤاخذه !! ويروح مطلع من جيبو منديل أحمرومشوح بيه في الهوا ورابطو حول رقبته
.
. خالو مين دة … دة بحر أبو جريشة صوته غريب قوى بس بيلمس القلب قوى
و أنت بقة يا مفعوص فاهم يعنى ايه بيلمس القلب
علمنى كيف تغازل موسيقى أبو جريشة القلب مثلما علمنى كيف أغازل كرة القدم و تغازل أصابعى قطع الشطرنج .
.
.
جدو انا بحبك قوى أوعى تسيبنى انا ماليش غيرك
مسجى على فراش الموت يحتضر أبتسامته لا تفارق وجهه الأسمر اللامع
صغيرا متعلق بطرف سريره أبكى فقد كان بطلى الأسطورى و معشوقى الاول و الاخير
يكشف الجلباب الأبيض الأسوانى الفضفاض عن كتفه الأسمر لأجد أثار علامات سوداء قديمة ايه دة يا جدو
دى القصعة أوعى تفتكر انى لقيت كنز أو بقيت كدة بالصدفة الفلوس عمرها ما بتيجى الا بالعرق و التعب يا تكون زييى يا تكون دكتور وعالم زى أبوك بس أوعى تطلع أهلاوى أبن كلب زيه هوه عايز يبقى غيرنا و خلاص
لا انا عايز أكون زيك .. لا انت هاتكون فنان
و يغنى نصيحة أسمع يا قلبى دور فى كل أرض حب و أختار لقلبك واحد للأبد
أغنيه مين دى يا جدو … دة بحر أبو جريشة
لم أرى أبو جريشة و لا أعرف شكله و لكن أرتبطت صورته بصوره جدى الذى علمنى كيف أكون عاشقا فنانا و زملكاوى أصيل
.
.
.
أقف فى الصف الأخير وحيدا فأنا أخر المنضمين لفرقة الفنون الشعبية بالجامعة
.
التابلوه الجاى نوبى يا شباب .. يا ريت الناس تركز علشان عايز أختار السوليست
انت يا أبو شعر يا اللى فى الاخر رقصت فين قبل كدة
لا أبدا انا جابونى من منتخب الجوالة انا اللى بصمم الرقصات ليهم طيب تعالا أقف قدام
بس انت متأكد انك ما رقصتش فى حتة قبل كدة
بصراحة رقصت فى أوضتى على بحر أبو جريشة
.
فلاشات متلاحقة تذكرنى بأوقات طويلة قضيتها منتشيا راقصا على موسيقا بحر
.
صول البحرية الأسمر الملحن و المؤلف صاحب الصوت الخشن العذب الذى يختلط فيه أصاله النوبة بسحر الأسكندرية أخر ما يربطنى بالجنوب
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

1 comment: