تظاهرنا فى التحرير تانى ... و ماذا بعد التظاهر


ta7rer

نعلم جميعا أن التظاهر حق مشروع لكل مواطن فى جميع دول العالم المحترمة ... و حيث أنه العكس فى مصر

فلا أملك الا مقوله - إن ذلك النظام الفاشل لا يرانا شعبا محترما بالمرة - و عليه فليس من حقنا أن نتظاهر

و بين مشروعيه التظاهر و مدى جدوى التظاهر فى التأثير على القرارات المحلية و الدولية نستطيع أن نكتب

الالاف من التدوينات و التحليلات .... و ما يهمنا هو سؤال واحد

ماذا بعد التظاهر ؟؟؟؟ ... أسنقف مكتوفى الأيدى مهللين لعدة شعارات نرددها داخل كردونات أمنية

و نحن حتى الان لم نصل الى نبض و قلب الشارع الحقيقى

نعم هناك تعاطف و لكنه تعاطف مصمصة الشفاه ... تعاطف المتخاذلين المنبطحين

فإلى متى نفرح من مجرد أقامة شعائر المظاهرة .... و نحاول نسيان أهداف ذلك التظاهر؟؟؟؟

و إلى متى سنقف عند حد التظاهر ؟؟؟

ملاحظات على المظاهرة

ta7rer

لاتوجد خسائر غير نظارتى دروبى و عمر الهادى و تى شيرت علاء سيف

ta7rer

لأول مرة فى التاريخ يحاول الضباط حماية العساكر من المتظاهرين

و ذلك أن دل على شىء فيدل على نجاح فكرة التصدى

للعساكر و حماية المتظاهرين

ta7rer

مش عارف ليه كذا واحد رجعنى لما جريت عليهم بدعوى انى لسه قايم من علقة

أذا كنت أنا اتخطفت و أضربت المظاهرة اللى فاتت فالمتظاهرين

المرة دى خطفوا أتنين عدموهم العافية

و دة أكيد التطور الطبيعى .... لان مش كل مرة المتظاهرين اللى هايذوقوا نفس الكأس

و دة يعكس أن الكل حصله عملية تصعيد لحواسه التظاهرية

بفش غله فى العسكرى الغلبان اللى قدامه

و أعتباره رمز من رموز النظام الظالم

و دة أحساس صعب جدا

لما المصرى يضرب مصرى

Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

22 comments:

  1. على فكرة اسلوبك فى الكتابة كويس جدا ما شاء الله ... واستمر الى الامام ليس فى التخاريف ولكن ندعوا الله ان يهديك وتعقل وتبطل تخاريف
    محمد السعيد

    ReplyDelete
  2. طيب ياجيمي

    في بعض الاحيان بيكون التظاهر مؤثر جدا في القرارات ...ومحدش يقدر ينكر تأثير التظاهر في مسأله زي مسأله القضاة مثلا


    ومحدش يقدر ينكر برضه ان اي مظاهره حتي لو كان عددها عُشر العدد اللي كان موجود في التحرير ده كانت برضه هيبقي ليها تأثير حتي لو كان تأثير قليل

    وكمان هوه اصلا الفايدة من التظاهر في المقام الاول التعبير
    بعد كده ممكن ييجي في المقام التاني مثلا الضغط
    السؤال بقي ...احنا بقالنا اكتر من سنتين بنتظاهر ...طب وبعدين

    ايه اللي حققناه وايه اللي كنا عاوزين نحققه ؟؟

    احنا حققنا اه حاجات من التظاهر ده ...لكن مش كل حاجه بنتظاهر علشانها بتتحقق طبعا

    المظاهرات إستمرارها هيعمل الكتير ..وعلشان كده بيخافو منها

    دا احنا كمان المفروض نتظاهر اكتر من كده

    تعرف ان مفيش ولا حركة تغيير إتظاهرت ضد الغلاء اللي الشعب مولع منه !!!! بس بقي ايه الرغي ده كله .... هوه مين ده اللي كان بيمنعك تروح للامن صحيح ..كانو المفروض يسيبوك ...علشان نشوف بقي هتاخد حقك من بربريه امن الدوله إزاي :))

    ReplyDelete
  3. مش صحيح أن مكانش فيه مظاهرات عشان الغلاء، كان فيه مظاهرات عشان الغلاء و مظاهرات عشان البطالة.

    بالنسبة للاشتباك مع الأمن، أنا شايف أن لازم يكون هدفه كسر الكوردون حتى لو الأمن هو اللي بدأ، اللي حصللي أنا و دروبي أننا عدينا للناحية التانية فعلا و لقينا نفسنا لوحدنا لأن باقي الشباب كان بيشتبك من غير ما يحاول يعدي، الهدف مش الخناقة الهدف أننا نوصل صوتنا للناس و الأمن بيمنعنا، يا نقبل الوضع و فقط نتأكد أنهم ميضيقوش علينا و محدش يجراله حاجة، يا ما نقبلش الوضع و نكسر الكوردون (و ده محتاج تكاتف و عدد و زق مش ضرب).

    ماذا بعد التظاهر ده سؤال كبير، المشكلة أن مفيش أمل في النظام القائم و بالتالي التظاهر من أجل مطالب اصلاحية ده عملية عبثية، التظاهر دلوقتي الهدف منه بناء حركة تقلب النظام الحاكم تماما، فكروا ايه الأنشطة التانية اللي ممكن تخدم ده.

    يعني لو خدت موضوع لبنان و فلسطين كمثال، أكثر حاجة نقدر نقدمهالهم هي قطع الغاز و البترول و ما شابه عن اسرائيل، بس مؤكد مؤكد الحيوانات اللي بتحكمنا مش هتعمل ده لو عملنا ايه، يبقى الحل الوحيد أن العاملين في شركات البترول و الغاز يضربوا، و عشان ده يتحقق لازم نكون أكبر و أقوى بكتير من اللي أحنا عليه دلوقتي، و السؤال بقى ازاي نبقى أكبر و أقوى؟

    ReplyDelete
  4. kalam 7or

    حمد لله على السلامة و يا رب تكون كويس دلوقت ... و الله دة انا بقالى فترة مش عارف اكتب كلمتين عدلين جنب بعضهم

    و سعدت بمعرفتك جدا

    ReplyDelete
  5. shoowbash

    و الله يا شوبش شوف
    انا معاك ان التظاهر ليه تأثير بس مش فى مصر علشان هنا ودن من طين وودن من عجين فى أوروبا ممكن يتظاهروا اربعة خمسة و يأثروا فى الحكومة و يسقطوها و انا ليا اصحابى عملوا مظاهرة فى امستردام اتنين راجل و مراته
    و الدنيا اتقلبت هناك يا شوبش الدنيا تقوم و ما تقعدش علشان طفل مثلا ابوه بيضربه

    طيب هنا بقة بنتظاهر و نتظاهر و ما فيش فايدة من التظاهر لان ما فيش حد بيسمعنا الا وكالات الانباء حتى دى ابتدت تزهق من المصريين انت بتقول بيخافوا من المظاهرات هما مين دول ؟؟؟

    انت يا باشا بتهوهو جوه كردون امنى دة اخرك هايخافوا من ايه

    انت واحد بالنسبالهم مجنون طالع عينك فى حياتك تيجى فى وسط البلد تجعر شويه و تغور فى ستين داهيه بعد ما يقرفوك على امل انك ما تجيش تانى

    هيه دى الحقيقة

    ReplyDelete
  6. Alla

    بص أجمل حاجة أن علاء اتكلم على أستراتيجيات أتكلم على استراتيجيتيين مهمين جدا

    أولا استراتيجيه التظاهر


    هوه اننا نطلع برة الكردون و دة اللى انا بقول عليه لشوبش يا علاء

    أظن انت اهوه معايا فى ان صوتنا مش نطلعه لبعض قضايانا كلنا عارفينها و زهقنا من مناقشتها مع بعض النجاح اننا نوصل للناس

    نطلع برة الحاجز الامنى دة و نفوكنا من التجعير و التسقيف زى القرود دة علشان الناس اللى برة الكردون تثق فينا على الاقل و نكسب تعاطفهم

    يا علاء احنا كنا بنزق الكرددون و الاخوة المسقفاتيه بيتفرجوا علينا

    و انت قلتها بنفسك احنا بنكسر و مفيش حد ورانا يعنى اللى معاك او اللى مفروض معاك فى المظاهرة مش هدفهم يخرجوا للناس و يوصلوا للشارع الحقيقى و تكون مسيرة لاول مرة نستخدم فيها ديك ام كلمة حاشدة اللى نفسى ادوق طعمها دى لا دة هدفهم يسقفوا و يغنوا و الناصريين يقدموا فقرة القرد فى السيرك

    ReplyDelete
  7. Alla الاستراتيجيه التانيه

    الاستراتيجيه التانيه بعد استراتيجيه الخروج من الكردون


    هيه اساليب الضغط

    علاء انت طرحت موضوع الطاقة و دة اهم اسلوب ضغط بس يا ترى ازاى هانوصل للعمال يعملوا اضراب

    ازاى نشل القاعدة العريضة دى العمال فى البترول مش ناقصهم حاجة

    شقق تلفزيونات عربيات مش ناقصهم اى حاجة يطالبوا بيها

    طيب و العمل ؟؟؟؟


    كلمتك يا علاء ازاى نبقى اكبر و اقوى ترد عليها جملتك


    ماذا بعد التظاهر ده سؤال كبير، المشكلة أن مفيش أمل في النظام القائم و بالتالي التظاهر من أجل مطالب اصلاحية ده عملية عبثية، التظاهر دلوقتي الهدف منه بناء حركة تقلب النظام الحاكم تماما، فكروا ايه الأنشطة التانية اللي ممكن تخدم ده.


    اللى قلته دة لو فعلناه هوه دة اللى يعمل قاعدة اكبر و اوسع انتشارا

    ReplyDelete
  8. :( كان نفسش أبقي موجود بس الله يجازيه اللي في بالي بقي .. المهم بص يا عم جيمي .. ماذا بعد المظاهرة ؟؟ بعد المظاهرة لازم يبقي في مظاهرة ومظاهرة و اعتصام و معارض ..لازم يبقي في شغل اكتر من كده .. وزي مقال علاء احنا هدفنا دلوقتي مش ان حسني و شلته يسمعو كلامنا ..لأ ..إحنا هدفنا ان الناس هي اللي تسمع كلامنا .. و ده مش هيجي الا بالتلاحم معاهم .. بس المهم اننا كل مرة ننزل فيها نتعلم حاجة جديدة نعملها المرة اللي بعدها .. يعني أظن ان المرة الجاية مش انت و علاء و اسد و اللبقيين القلائل اللي كانو معاكم هم اللي هيزقو الكوردون اكيد في ناس هتعمل .. دلوقتي بقي بجانب موضوع لبنان و فلسطين لازم نعمل حاجة علشان البنزين والغلاء .. المهم انا راجع مصر النهاردة و لازم اشوفك

    ReplyDelete
  9. ما تقلقش يا سيزر

    انا كنت عارف انك مش جاى علشان كدة

    روحت المظاهرة بالقميص بتاعك

    اللى اديتهونى لما قميصى اتقطع فى المظاهرة اللى فاتت

    و كل اللى يسألنى عليك

    اقولهم هوه مش موجود لكن قميصه موجود :d

    --------

    يا سيزر فى ناس اصلا بتروح لمظاهرات علشان تهتف و تسقف

    مش فى دماغها انها تطلع للناس

    و لا هدفها ان القاعدة العامة للرافضين
    لحكم الطاغيه تكبر

    المشكلة مش فى الناس المشكلة فى المعارضين الاغبية دول

    اللى فاكرين المعارضة حكر عليهم و انهم كدة مناضلين و تولع الناس و توعيتهم

    ReplyDelete
  10. يبقي احنا كدة يا معلم مهمتنا تكبر .. مش بس نوسع الدايرة و نكتر الناس .. احنا لازم نوعي الناس اللي انت بتتكلم عليهم دوول .. بس انا مش عارف اكيد هم مش بيبقوا قصدين ان المعارضة تبقي حكر عليهم

    ReplyDelete
  11. فى فكرة مجنونة جوايا هامموت و اعملها

    ليه ما ننزلش القرى من دلوقت لحد الانتخايات الجايه

    نعمل توعيه و ننشر المعارضة بين الناس


    نعرفهم مساوىء الحكم اللى موجود

    مش بس نهتف و نطالب انهم يسمعوا هتافنا و يبقوا متفاعلين معاه

    لا احنا كمان ننزلههم و نتفاعل معاهم

    ReplyDelete
  12. انا لما قلت ان مفيش ولا حركة تغيير عملت مظارهره علشان الغلاء كان قصدي الغلاء الاخير في الاسعار

    مش عارف بقي إذا كان حصلت مظاهره فعلا علشان الارتفاع الاخير في الاسعار ولا لا
    وياريت لو كان حصلت تقولولي ..

    ما علينا

    انا قولت انهم بيخافو من المظاهرات ..بدليل انهم بيمنعوها ...وبيكردنوها

    طب لو مش خايفيين منها ليه بيحاولو قمعها


    وليه تم قمع مظاهرات القضاه ...مع انهم كانو يقدرو يكردنوها برضه ويسيبونا نهوهو

    طبعا فكرتك ياجيمي اللي بتقول فيها انك عايز تنزل القري ووصفتها بالمجنونه

    انا شايف انها بالعكس ..دي قمة العقل

    بس لما تحصل لازم يتربلها كويس ...علشان منخسرش ونكسب


    معاك تماما ياعلاء ان المفروض يكون هدفنا هوه الخروج مش الاشتباك ...

    لان محدش يختلف ان وصولنا للشارع العادي من اهم اهدافنا من التظاهر

    يسعد مساكم :))

    ReplyDelete
  13. هوه فعلا ما حصلش اى تظاهر عن الغلاء فى الفترة الاخيرة

    بس ربنا يسهل و احداث لبنان تخلص علشان نرجع لقضيتنا تانى

    هما بيخافوا بس من تضامن الناس معاك

    مش اكتر هيه دى كل الحكايه اللى احنا بنأكد عليها

    اما بخصوص فكرة نزول القرى

    انا فعلا عمال اتكلم فيها مع كام واحد

    و نشوف متطوعين للموضوع دة

    و ما يكونش كله تظاهر تظاهر

    ReplyDelete
  14. انا مع التظاهر بس مش مع الضرب حتى لو هم اللى بدأوا وطبعاهم اللى هيبدأوا علشان يجرونا لمنطقة قوتهم الا و هى العنف و يا خسارة دايما بنقع فى الفخ و نتخانق معاهم , تتضييع للجهد و الكرامة على الفاضى
    انا شايف ان الوضع فى مصر مش هيتغير بالقوة فى الوقت الحالى لان الشعب اضعف من انه يتحدى النظام بعنف , فلازم اتباع سياسة اللاعنف
    يعنى ما نحاولش فى اى مظاهرة نستفذ العساكر او الظباط او نديهم الفرصة يستفذونا , نعمل اكنهم مش موجودين اساسا , العنف مش هيؤدى غير لمزيد من العنف و احنا الخسرانين فى الاخر
    ياريت المظاهرة الجاية نبين للحكومة اد ايه احنا اذكى منهم و اكثر احتراما منهم
    ياريت مظاهرة سلمية بجد

    ReplyDelete
  15. انا بقة مش مؤمن بالموضوع دة نهائى يا خالد

    مش الهدف اننا نبقى جوة كردون بنهتف و خلاص

    ReplyDelete
  16. بس ماحصلش مرة ان الخناق فى مظاهرة خرجنا بره الكردون , و مش هيحصل لان اعدادنا بتكون قليلة بالنسبة لاعداد الامن الموجود , يبقى نفكر فى اسلوب مختلف يلفت النظر و من غير احتكاك بالامن

    الناس بتحب الحركات الغريبة و المختلفة و الاعلام برضه بيهتم بالحاجات دى , يبقى نتظاهر باسلوب جديد
    مثلا مرة نروح كلنا لابسين كمامات على بقنا
    حد يروح راسم علم لبنان على جسمه
    او اى حاجة تانية تكون غريبة
    ده هيشد الناس
    مثلا فى المظاهرة كله يرفع الجزم لفوق كاسلوب للاعتراض
    حاجات كده

    ReplyDelete
  17. يا ابو خالد بالراحة بس

    انت كدة حولتنا لمشجعين فى ماتش كورة و لا ايه ؟؟؟

    ReplyDelete
  18. ياريت ييجى المظاهرات ربع اللى بيروحوا الماتشات و هيكون برضه علشان مصر
    مش شرط الافكار اللى كتبتها , انا كنت بس بقربلك الصورة

    ReplyDelete
  19. أنا شايف ان المشكلة الحقيقية فى الناس مش الامن احنا محتاجين نوصل للناس دى ونحركها ونخليها تبطل تقف من برة وتبطل سلبية لازم نوعى الناس ان لهم حقوق مغتصبة من قبل الدولة ومش هياخدوها الا بالاعتراض والمظاهرات وكمان أنا شايف ان احنا لازم نغير من اساليبنا فى المظاهرة ليه مثلا مانعملش مظاهرة صامتة نرفع فيها اللافتات وتكون على واحدة منهم مثلا انك لو متفق معانا اضرب كلاكس او ارفع ايدك اليمين لازم نحاول نخلى الناس تاخد موقف وانها تعبر عن اعتراضها حتو لو مش هتدخل معانا المظاهرة بالطريقة دى هنخلى عدد اكتر يشترك حتى لو بفعل بسيط وفكرة اللف على القرى دى كويسة جدا وانا مستعد فى المشاركة

    ReplyDelete
  20. ان شاء الله يا خالد ربنا يكرم

    ReplyDelete
  21. سميح

    أنتظر فعلا انا بحضر خطه للمبادرة دى علشان دى لازم لها دعم كبير جدا مش شرط احنا و بس

    و خليك معانا و تابعنى علشان تعرف المواعيد

    ReplyDelete
  22. شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض
    شركة كشف تسربات المياه بالرياض

    ReplyDelete