اسطورتنا .. احنا


السلام علي من اتبع الهدي، وكره السحالي الخضراء ودعي وطالب بسقوطهم ثم أما بعد، في هذا الوقت "الحساس" من عمر الوطن هاحكيلك حكاية "احنا" أسطورتنا ولامؤاخذة.. وهي بالمناسبة اكثر تسلية من حكاية البلبل
احنا ٨٥ مليون ملتحي .. و ٨٥ مليون مطول شعره
٨٥ مليون لابسين جينز .. و٨٥ مليون لابسين جلابية
٨٥ واقفين علي ناصية يعاكسوا البنات .. و٨٥ تانيين قاعدين ف الجامع يحفظوا قرآن
٨٥ مشغلين قناة الناس .. و٨٥ فاتحين قناة ميلودي 
٨٥ مليون بنت مشغله حكيم ومتحزمة وبترقص .. و٨٥ مليون تابعة لعمرو خالد وبتشتغل ف جمعية رسالة
احنا ٨٥ مليون بنت محجبة .. و٨٥ بنت عاملين شعرهم كيرلي .. و٨٥ ممكن يقلعوا ويحطوا صورهم ع النت
احنا ٨٥ محلل كروي و٨٥ مليون محلل سياسي و ٨٥ مليون عايزين ياكلوا ويشربوا بس
٨٥ مليون قاعدين ع الكنبة .. و٨٥ مليون في ميدان التحرير
احنا نفس الناس اللي عايزة استقرار .. هي نفس الناس اللي عايزة تحارب اسرائيل 
نفس الناس اللي بتحب المجلس وشايفة ان مفيش غيره .. ولما تضغط عليها تقولك ماهو اصلا المشير حرامي
هما هما نفس الناس اللي شايفه ان مبارك اكبر فاسد .. ومش فارق معاها نسامحه، نفسهم اللي عايزين يعدموه
نفس الناس اللي بيلعنوا الخلايجة ويقولوا عليهم بهايم وتلاقيهم يسافروا ويتكفلوا ويرجعوا بالجلابية وثقافة وهابية
احنا نفس الناس اللي بتتكلم اننا ارجل شعب عنده نخوه .. هي نفس الناس اللي عندها اكبر نسبة تحرش
احنا نفس البلد اللي فيها اكبر نسبة تدين .. واكبر نسبة بحث عن كلمات الجنس علي الانترنت
احنا نفس الناس اللي عايزة دولة اسلامية وبيحبوا الكورة والسيما والموسيقي وليلي علوي
احنا مختلفين ومتناقضين 

الحياة صعيبة يا أبو احمد

Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

العزيز النوجاني


العزيز النوجاني
تأخرت عليك وأنت تعلم كم هي الحياة صعيبة بالزاااف
أحب ان اعلمك اننا نتمسك بالبقاء محافظين علي كود بحر الرمال
نعمل علي بقاء النوع، ونحفظ السلالة ونبقي أسرارنا في حجرات مغلقة، ونمارس النميمة قدر الإمكان
لا ينقصنا إلا جلوسك في أحد الأركان ممددا ساقيك مشعلقا سيجارتك تجاه سقف الحجرة
لن أشكو الدنيا والزمان و"ولاد الوسخة" كعادتي معك
فلقد تأكدت منذ فترة إنك "عملت الصح" وما قد كان قد كان
لقد فشختنا "السحالي الخضراء" وعلينا الإعتراف بأن "البروستاتا" تحكم المدينة
فيما عدا ذلك
فالحياة تسير ببحر الرمال علي "أوجه" ما يكون وننتظر عدة مولات جديدة
وكلنا أمل ان تسلك الكائنات الفضائية طريق "المحور" في محاولتها لغزو الأرض
ارجع .. كوكبنا يحتاجك
ملحوظة: أضفنا "البلاي ستيشن " لقائمة قتل الملل في ليالي الكوكب الحزينة
اللي امه بتدعيله .. احسن م اللي امه بتديله
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.