مركز إستعلامات الإنتخابات .. إنتهاك خصوصية وإحياء أموت


حاولت أجرب زى أى مواطن مصرى عادى، محتاج بياناته الإنتخابية وسمع عن إن الحكومة وفرت مركز إستعلامات إلكترونى   للإنتخابات تستطيع من خلاله معرفة دائرتك الإنتخابية ورقمها و مقرها ورقم قيدك ورقمك فى الكشف
إلا إننى وجدت عدة مفارقات أخرى  قمت بتجربتها على أسماء تربطنى بهم صلة قرابة من الدرجة الأولى .. الظاهر إن مركز الإستعلامات إيده فرطة شوية فى المعلومات 
أولا : تستطيع وبكل سهول معرفة الرقم القومى الخاص بأى مواطن إذا كنت تعرف إسمه الرباعى .. فعالة و تعمل بشكل 100 % بدون خطأ
ثانيا : فى بعض الأحوال لا تتيح نتائج البحث الرقم القومى - فى الحالة السابقة- بدلا منها وعوضا على مجهودك الكريم فى البحث يوفرون لك العنوان بكل وضوح وصراحة .. دة نتيجة البحث اللى طلعتلى على أصغر إخواتى البنات اللى طلع عنوانها أول ما كتبت إسمها الرباعى وبدون ظهور الرقم القومى 
ثالثا : و دة الأهم وجدت أختى الشقيقة المتوفاة وهى فى شهرها التاسع من حوالى 28 سنة والمولودة ومتوفاة قبل التسجيل التلقائى مدرجة بالجداول الإنتخابية حية ترزق ولها رقم قومى، وأنا المولود قبلها بشهور ومازلت حى غير مدرج بأى جداول إنتخابية
دى مش المرة الأولى اللى أكتشف إن أختى المتوفاة حية عند الحكومة .. إكتشفت دة أثناء إستخراجى القيد العائلى العام الماضى بالرغم من عدم وجودها فى نفس نوع القيد الذى إستخرجته سنة 2004


تحديث : هناك أقاويل إن الموقع غير حكومى و إنه تابع للإخوان - و دة أخطر- و لو إن الموقع يتم الترويج له على الانترنت حتى الأن على إعتبار إنه موقع حكومى 
Mohamed ABADY Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.

12 comments:

  1. بس يا جيمي المناطق المتاحة حالياً في البحث ( النزهة - مصرالجديدة - مدينة نصر - المرج - السلام - عين شمس - المطريه - حدائق القبة) في محافظة القاهرة.

    يمكن انت مش من المناطق دية عشان كدة اسمك مظهرش

    ReplyDelete
  2. هي دي مصر يا عبلة :D

    ReplyDelete
  3. يعنى إخواتى من المناطق دى و أنا من كوله مثلا .. يا ريس إنت مهنج للدرجة دى ؟

    ReplyDelete
  4. متألق بصراحة في الإنتخابات دي يا جيمي
    مجموعة بوستات ورا بعض جامدين
    :D

    ReplyDelete
  5. الله يكرمك يا لستو ... بس مش موضوع إنتخابات أنا بكتب يومنى بقالى داخل على شهر و زيادة اهو

    قررت كدة بعد عيد ميلادى التلاتين :D

    ReplyDelete
  6. اولا : ده مش موقع حكومي , ده موقع تابع لاخوان شرق القاهرة وخاص بدوائر شرق القاهرة فقط وهي
    النزهة - مصرالجديدة - مدينة نصر - المرج - السلام - عين شمس - المطريه - حدائق القبة

    ثانيا : من حق اي مرشح في اي دائرة الحصول على كشف ببيانات جميع الناخبين في دائرته مقابل رسم قدره 100
    جنيه طبقا لقانون مباشرة الحقوق السياسية

    ونروح بعيد ليه .. ممكن لو فتحت موقع 140 اون لاين وكتبت اسمك : (محمد جمال بشير) هيجيبلي رقم تليفونك لو كان ليك رقم تليفون مسجل باسمك وده برضو مثال اخر لانتهاك الخصوصية

    mtwfeeq

    ReplyDelete
  7. هو انت بتغنى و ترد على نفسك ليه ؟؟؟

    ReplyDelete
  8. يا عم مش موقع حكومى و يارب تكون هديت ... و نشوف بقة مين ابن الوسخة فى الحكومة اللى رامى معلوماتنا للناس كدة

    و بعدين ايه علاقة عدد الدواير و اسمائها بالموضوع ؟

    و لمعلومياتك علشان انت بس بتتذاكى قوى الموقع بيتم الترويج له على الانترنت على انه موقع حكومى

    ReplyDelete
  9. و ايه اللى جاب 140 أون لاين دلوقت ؟؟؟ .. انا مستغرب بصراحة كل ما اكتب حاجة الاقيك بتتكلم عن حاجة تانية .. و تناقشنى فى الحاجة التانية

    يعنى النهاردة بس .. انت عملتلى تاريخ ميلاد من تأليفك و داخل تكتبلى اسمى الثلاثى و بتفترض وجودى فى دايرة انتخابية على مزاجك حتى موت أختى اتدخلت و عدلت فيه .. حاجة تفرس

    ReplyDelete
  10. أنا لقيت اسمي في الجداول مع إني مش مطلع بطاقة انتخابية!!!!!!!!!!!!!!!!!!!!!!

    ReplyDelete