لماذا اشعر بالاطمئنان بعد فوز السيسي برئاسة مصر؟

لو هاكتب سيناريو برجماتي جدا للثورة المصرية من اول يوم

فيه كل اعدائي الطبيعيين بيظهروا علي السطح ويخسروا

من نخبة واخوان وسلفيين بأنواعهم .. ووسطيين بأشكالهم

كل الرمم الجايفة .. حتي الواقفين في نفس صفي

عمره ما هايكون بالدقة والاحكام دة في اللي بيحصل دلوقت

بتقول: اننا نخبة غبية لشعب جاهل .. ماقدرتش تعلمه فعلا ؟! .. دة حقيقي ماشي

بس تعالي نبص كدة للصورة الكاملة اللي بيتحط آخر رتوشها دلوقت

من ٢٠٠٥ الي ٢٠١١ بتنبح في صوتك والناس ولا هنا

وهوب فيديوهات تونس تطلع والناس تشوف الثورة فيديو وتنزل تعمل زيها

واختاروا اقرب الحلول واسهلها بعد كدة بالموافقة علي كل شيء

بعد كدة الناس في الحقيقة انقسمت بين الاكس عسكري والديني

وفي الاخر قالك ناخد الديني

وبعد ما جربوه نزلوا شالوه

ودلوقت جابوا العسكري عشان يجربوه

يعني احنا امام مجموعة من البشر في محيط جغرافي ما .. فهمهم فعلا علي قدهم، وبالخصوص في موضوع السياسة دة .. لسه بيجربوا يحطوا ايدهم ع النار فيقولوا اح ويتعصبوا ويدبدوا في الارض .. وتاني يوم ما يمسكوش النار تاني

واكيد انت عارف ان احنا شعب ملوك الكلام ومابيقتنعش بكلام حد وبيجادل علي الفاضي ..يفرهدك يفرهدك .. لحد ما تسيبه مع نفسه شوية يتقرص وتلاقيه اتعلم

***

انا قعدت قائد ومدرب كشافة فترة طويلة ..لما كنا بنتعلم مناهج التدريب كنا حافظين جملة

"التعلم بالممارسة يعني تنمية الفرد كمحصلة للخبرات العملية والتي هي فوق كل شيء .. معلم فعال ومؤثر للغاية"

***

يوم 28 يناير .. قلت لصديق "احنا دورنا انتهي" .. ايماني بالجملة دي ما اتهزش لحد دلوقت لان القرار الجمعي انك ماتبقاش "طليعة ثورية" تهرس كل شيء وتحكم في اللحظة الثورية دي .. معناه حاجة واحدة، انك لازم تسيب الناس تجرب، لان من الواضح، واللي دلوقت مؤكد ان الناس مش هاتسمع لأي رأي منطقي في وقتها ابدا .. وانك مش هاتتحكم في اللي جاي .. ضيف عليه انك متخبط وقليل الخبرة الخ

وعليه كل اللي بيحصل من الناس دة منطقي جدا .. ناس لا تملك الا العواطف

والعواطف يا صديقي .. كما تعلم .. عفوية .. هشة .. وغير مأمونة العواقب

***

انا مؤمن ان الخمر الجديدة .. يلزمها قوارير جديدة

مؤمن كمان ان كل مرة الوجوه بتتغير وتتبدل وشاشات التفزيون بتجيب ناس يتحرقوا ويمشوا

مؤمن كمان ان اللي جاي مش بالضرورة هاشارك فيه

مؤمن كمان ان اللي جاي هايصعب السيطرة عليه

مؤمن كمان ان اللي جاي اسهل بكتير من اللي فات

مؤمن اننا فتحنا بطن بلد، واه وقفنا كلنا بغباء مش عارفين هانعمل عملية ايه بالضبط، وايه اللي قبل ايه؟ ونقطع ايه ونوصل ايه؟

بس العيان في العملية دي ما بيموتش .. مفيش بلد بتموت

ولو في الف دكتور واقف بيدي النصايح

هاتلاقي الف واحد يردوا عليه: وسع كدة يا باشمهندس انت بس وبلاش صداع

عشان كدة الناس هاتفضل "تلغوص" في البطن اللي اتفتحت دي

وتجرب وتجرب ... ومع التجارب دي ناس اكتر هاتتعلم

او علي الاقل هاتتعلق بأي امل .. وناس هايشيلوا ايدهم

وناس تانية تكمل .. هايتعلموا يسمعوا بعض علي الاقل

ويشتغلوا مع بعض جايز

***

خدها كلمة من واحد وقف سنين علي سلم نقابة يتظاهر مع 50 صحابه .. والشعب كان بيعدي "يبعبصلهم" في الجو من العربيات

هو هو الشعب العظيم اللي عمل الثورة

هو هو الشعب بتاع نعم للتعديلات الدستورية

هو هو الشعب اللي انتخب الاسلاميين ... واختار دستورهم

هو هو الشعب اللي جاب مرسي للحكم

هو هو نفس الشعب اللي شاله ... واختار دستور جديد

هو هو .. وياللعجب .. اللي جاب السيسي

عشان كدة شد كرسي واقعد اتفرج .. احنا في اكتر سيناريو عبقري ممكن يحصل صدقني

Gemyhood محرر المدونة

Mohamed ABADY [a.k.a @Gemyhood] is an Egyptian Blogger and Published Author since 2005, Music Curator, New Media Expert-Trainer, Comics and Hiphop Artist.